မြန်မာနိုင်ငံတွင်းမှာ တိုက်ခိုက်မှုတွေ လုပ်လာနိုင်ကြောင်း မလေးရဲတပ်ဖွဲ့ ပြော

နိုင်ငံတကာ၊ စက်တင်ဘာ ၁၈၊ ၂၀၁၇

မြန်မာနိုင်ငံတွင်းမှာ တိုက်ခိုက်မှုတွေ လုပ်လာနိုင်ကြောင်း မလေးရဲတပ်ဖွဲ့ ပြော ခဲ့ကြောင်း RFA Burmese Facebook စာမျက်နှာတွင် ယနေ့ ဖေါ်ပြထားပါတယ်။

ဖေါ်ပြချက် အပြည့်အစုံမှာ- 

ရခိုင်ပြည်နယ်အရေးနဲ့ ပတ်သက်ပြီး မလေးရှားနိုင်ငံသားတချို့ စစ်သွေးကြွအဖွဲ့တချို့ရဲ့ အကူအညီနဲ့ မြန်မာနိုင်ငံတွင်းမှာ ဂျီဟတ် တိုက်ခိုက်မှုတွေ လုပ်လာနိုင်ခြေရှိနေတယ်လို့ မလေးရှား ရဲတပ်ဖွဲ့က အတည်ပြု ပြောဆိုကြောင်း မလေးရှား Bernama သတင်းက ဖေါ်ပြပါတယ်။

တန်ပြန်အကြမ်းဖက်တိုက်ဖျက်ရေး အထူးအဖွဲ့ လက်ထောက်ညွှန်ကြားရေးမှူး အယွတ်ခန် မိုင်ဒင်ပီချေးက ပြောကြားခဲ့တာပါ။ မလေးရှားမှာရှိတဲ့ Daesh စစ်သွေးကြွအဖွဲ့က ရိုဟင်ဂျာ ပြဿနာကို လက်နက်သဖွယ် အသုံးချပြီး တပ်သားသစ်တွေ စုဆောင်းနေကြောင်း၊ လူမှုကွန်ရက်တွေမှာ ဖေါ်ပြနေကြတဲ့ ရိုဟင်ဂျာသတင်းတွေ၊ဓါတ်ပုံတွေကြောင့် Daesh စစ်သွေးကြွအဖွဲ့အတွက် လူသစ်တွေ စုဆောင်းရရှိနေကြောင်း၊ အလားတူ အင်ဒိုနီးရှားမှာလည်း အကြမ်းဖက်အဖွဲ့တွေက ရိုဟင်ဂျာ ကိစ္စအသုံးချပြီး လူသစ်တွေစုဆောင်းနေကြောင်း ပြောကြားခဲ့ပါတယ်။

မလေးရှားမှာ ကျင်းပခဲ့တဲ့ လူငယ်တွေနဲ့ ISIS အန္တရာယ်အရေး ဆွေးနွေးပွဲအပြီးမှာ သတင်းမီဒီယာတွေကို ပြောကြားခဲ့တာပါ။

ဒီအတွင်း အီရန်နဲ့ ပါကစ္စတန် စစ်တပ်အကြီးအကဲတွေက ရခိုင်ပြည်နယ်က ရိုဟင်ဂျာတွေ အကြမ်းဖက်ခံနေရတဲ့အပေါ် အရေးယူဆောင်ရွက်ကြဖို့ မွတ်စလင်ကမ္ဘာကို တိုက်တွန်းလိုက်ကြောင်း Iran Daily သတင်းက ဖေါ်ပြပါတယ်။ ဒုက္ခသည်တွေအတွက် အကူအညီတွေ မလုံလောက်တဲ့အတွက် တိုးမြှင့်ကူညီဖို့လည်း ပြောဆိုခဲ့ကြပါတယ်။

ဒီအတွင်း ဟောလိဝုဒ် ရုပ်ရှင်သရုပ်ဆောင် အိန်ဂျလီနာ ဂျိုလီကလည်း ရိုဟင်ဂျာတွေအပေါ် အကြမ်းဖက်မှုတွေ ရပ်တန့်ဖို့၊ ဒုက္ခသည်တွေကို ပြန်လာခွင့်ပေးဖို့၊ ဒေါ်အောင်ဆန်းစုကြည်အနေနဲ့ အသံတိတ်မနေဖို့ သတင်းမီဒီယာတစ်ခုကို ပြောဆိုခဲ့ပါတယ်။

News credit to RFA Burmese 

Reference Link: https://www.facebook.com/rfaburmese/posts/10156655213443128

Retrieved Date: 18/09/17